نور اقوى من نار جهنم

أبداً الموضوع بسيط جداً وده هايبان فى القصص اللى هاقولها ليكم دلوقتى ونبدء بالحجاج بن يوسف الثقفى

وده كان راجل شديد قوى وماكنشى يهمه حد واللى يقع تحت ايده خلاص يبقى مات ماهو اللى قال
لما سمع عن بعض الثوار :أرى رؤساً قد أينعت فقد حان وقت قطفها

يعنى بالنسبة له القتل ده حاجة بسيطة جداً والحل الجذرى لاى مشكلة يعنى بشكل أبسط اى حد عامل مشكلة أنا ليه أتعب نفسى واحكمه وبعدين يدخل السجن ويطلع وممكن يعمل مشكلة تانى لأ انا اريح دماغى واقتله

وهو اللى كان ماسك العراق فى عهد عبد الملك بن مروان ومن كتر قسوته قالوا عليه :انه لما اتولد مرضاش يرضع من امه ألا بعد ماشرب دم جدى والله اعلم بصحة الحكاية دى

يعنى راجل عايش من اول ماتولد على الدم المهم أن رغم شدته دى ألا انه فى راجل خلاص الحجاج كان هايقتله ألا انه سأله سؤال قبل ان يفعل

أيه هو السؤال ده....؟؟

قال له :انت صليت الفجر اليوم فرد عليه الرجل :فقال نعم صليته فى جماعة فسابه الحجاج ومعملهوش حاجة

ولما سالوه : أنت سبته ليه...؟؟
قال اصل أنا سمعت عن أبى : أنه قال انه سمع الرسول صلى الله عليه وسلم قال : أنه من صلى الفجر فى جماعة أصبح فى ذمة الله ومن تعدى على ذمة الله أنكب على وجهه فى النار وجر فيها

فانت بقى لو عايز تبقى فى ذمة الله يبقى أنزل وصلى الفجر فى جماعة

فيالا بينا نروح نصلى الفجر فى جماعة ولا فى حد فينا مش عايز يبقى فى ذمة الله

انتم عارفين فى حاجة كمان فقد قال الرسول صلى الله عليه وسلم فيما معناه

أن اللى بيروح يصلى الفجر ربنا بيعطي له نور وفى يوم القيامة لما نيجى نعرض على النار واحنا ماشيين على الصراط المستقيم

تخيلوا النار هاتقل الناس اللى بتروح تصلى الفجر ايه.......؟؟؟

النار هاتتكلم وتقول : اسرع يا عبد الله فان نورك كاد ان يطفئ نارى

يعنى كان اللى بيروح يصلى الفجر من كتر النور اللى ربنا هايعطيه ليه هايطفى نار جهنم يعنى كأنه خلاص ضمن الجنة باذن الله

فيالا بينا نروح نصلى الفجر علشان ندخل الجنة باذن الله